طول عمرك يا زبيبة

هذا في مثل دايما امي بتحكيه ( طول عمرك يا زبيبة في قفاكي هالعُودة !! )
حاولت كتير وضليت وراها لأفهم شو المغزى منه , فحكتلي انه الزبيب طبعا هدا اللي بيكون عنب قبل ما يتحول
من اول ما ينخلق العنب بيكون مشبوك بعودة بآخره وحتى لما بينشف العنب وبيصير زبيب بيضله في آخره عودة
حكتلها طيب وشو الحكمة من هالموضوع ؟
قالت يعني لما يجي واحد يمة ويقول انا طفران حالي ما هو انت زي الزبيبة طول عمرك ب ......ك هالعودة ...
حكتلها على هيك الشعب الفلسطيني كله مدحوش فيه عودة يا حجة ولا كيف
سكتت شوي وبعدين حكت شوف يمة
هو ان كان الشعب الفلسطيني اجت معه على قد العُودة بيكون هدا شعب الله بيحبه
ضحكت انا باقلها يا حجة هلاء خليني أفهم هي العودة بضم العين ولا العودة بفتح العين وتسكين الواو ؟
حكتلي لالالا الله يرضي عليك تحكيش بالسياسة معي يمة
انا باحكي عن العودة بضم العين هده اللي بتكون مدحوشة بكل زبيبة من اول ما تنخلق لحد ما ناكلها بصحن رز وحليب وهون القضية بتوقف معي
اما العودة بفتح العين يمة هده راح تخلي الشعب تبعنا ما توقف معه على عودة متل تبعة الزبيب بس
شكلها راح تصفي على عمود كهربا يا بنيي والله
حكتلها عمود كهربا يا حجة .....قالت اه يا دوب يكفي للتعبير عن الخوازيق اللي جاية
تخيلت الموقف وتخيلت كل فلسطيني مشرد ومصلوب على الحدود ...تخيلت وثيقة السفر وتخيلت ضابط الأمن المصري والاردني
والعربي ينظر الى الوثيقة والي صاحبها كأنه ينظر الى كارثة ستحل على بلده من وراء حاملها
وكيف تأتي فرقة امن المطار لتفحص اساس اللي خلفوه حفاظا على سلامة الوطن لا بد من التأكد من أن كل فلسطيني متل الزبيبة في قفاه عودة بضم العين ولكن مع السنوات يبدو ان عيدان الزبيب تتطور وتنمو بشكل كبير وكأنها تتناول الهرمونات
فتحولت الى أعمدة كهربا تنبأت بها أمي قبل سنوات طويلة وأصبح على الفلسطيني ان يحتمل عامود كهربا مشبوك في قفاه
والمثل اللي كنت اسمعه طول عمرك يا زبيبة في ط . ي .. ك هالعودة تحول الى " طول عمرك يا فلسطيني ب.ط ..... ك عامود كهربا
والظاهر تعودنا على مقاس الخازوق بس اتمنى تبقى الاحجام المعتمدة في الجهات الرسمية على ما هي لأنه ان كبر هالعامود
الله يساعدنا لأنه شي بيطلع الروح اكيد